Pas një periudhe trevjeçare të negocimit dhe bashkëpunimit të ngushtë në mes dy vendeve, dje është nënshkruar për herë të parë marrëveshja me Republikën e Maqedonisë në sferën e pensioneve. Këtë marrëveshje nga ana e Republikës së Kosovës e ka nënshkruar z. Nenad Rashiq dhe nga Republika e Maqedonisë, homologu i tij z. Spiro Ristovski, marrëveshje kjo që konfirmon periudhat e sigurimit për realizmin e të drejtës në pension për të gjithë ata që kanë punuar në shtetin e Maqedonisë dhe anasjelltas.
Ministri Rashiq, gjatë ceremonisë së nënshkrimit, ka thënë se kjo marrëveshje është baza ligjore për një bashkëpunim edhe në të ardhmen në realizimin e të drejtës në pension të qytetarëve që duhet ta gëzojnë këtë të drejtë.
Edhe homologu i tij nga Republika e Maqedonisë, z. Spiro Ristovski, ka siguruar që kjo marrëveshje e nënshkruar sot do të mundësoj realizimin e të drejtave të një numri të madh të qytetarëve që kanë pasur një stazh pune në të dyja vendet.
Të dy ministrat e të dyja shteteve ranë dakord që vazhdimin e bashkëpunimit ta thellojnë dhe më shumë edhe në fushat e ndryshme për një mirëqenie më të mirë për qytetarët e zakonshëm.
