Ambasada e SHBA-ve në Shqipëri nëpërmjet një komunikimi zyrtar në faqen e saj të internetit, ka shprehur shqetësimin për shpërthimet që po bëhen kohët e fundit në Shqipëri, dhe u kërkon shtetasve të saj, që jetojnë në Republikën e Shqipërisë, që të kenë kujdes kur ti parkojnë makinat.
Rritja e rasteve të shpërthimit të eksplozivit në makinat e disa shtetasve shqiptarë ka bërë që Ambasada Amerikane të japë alarmin për shtetasit e vet.
Ndër të tjera në njoftimin për shtyp shkruhet:
“Ambasada e SHBA-ve u tërheq vëmendjen qytetarëve amerikanë për rritjen e rasteve të përdorimit të eksplozivit me qëllim shkatërrimin e pronës kundër individëve në Shqipëri. Kryesisht viktimat janë përfshirë në konflikte personale ose çështje biznesi. Në shumicën e rasteve objekt i shpërthimeve janë makinat e papërdorura. Shtimi i përdorimit të këtyre pajisjeve ka rritur shqetësimin tek shumë rezidentë. Personeli i Ambasadës së SHBA-ve është udhëzuar të tregohet i kujdesshëm kur parkojnë makinat në vendet e parkimit publik dhe të rrisin sigurinë”.
Ambasada i këshillon shtetasit amerikanë që të informohen nga mediat në vend mbi rastet e ndodhura, të jenë më tepër vigjilentë dhe të rrisin sigurinë e tyre personale raporton shekulli online.
