Ish-piloti i Formulës 1, Eddie Irvine, është dënuar me 6 muaj burg pas një sherri në një klub nate të Milanos.
48-vjeçari ka goditur me gotë djalin e ish-kryebashkiakut të Milanos duke e dëmtuar rëndë në fytyrë. Gjykata e dënoi për agresion, ashtu siç dënoi edhe të dëmtuarin Gabriele Moratti, i cili e ka goditur i pari me grushta ish-pilotin e Ferrarit.
Gjithsesi, duke marrë parasysh sistemin italian të drejtësisë, Irvine dhe Moratti vështirë se do të kalojnë ndonjë ditë pas hekurave pasi automatikisht kanë të drejtën e dy apelimeve.
Sherri mes Eddie Irvine dhe Gabriele Moratti nisi për një mesazh që ish-piloti i dërgoi ish të dashurës së Morattit. Kur ky i fundit hyri në klubin e natës dhe pa që vajza me të cilën sapo ishte ndarë po fliste me irlandezin, nisi të godiste me grusht 48-vjeçarin.
Irvine, i cili në karrierën e tij ka qenë pjesë e skuderive Jordan, Ferrari e Jaguar, është kundërpërgjigjur duke e goditur me gotë italianin.
Nga karriera në Formulën 1, Eddie Irvine ka një pasuri prej 90 milionë eurosh/TCH/
