Presidenti i Republikës, Sh.T.Z. Bujar Nishani priti dje në Institucion përfaqësuesit e Asamblesë së 8-të të Shoqatës së Ombudsmanëve të Mesdheut.
Në fjalën e Tij, Presidenti Nishani, pasi ndau me të pranishmit edhe arritjen më të fundit madhore të vendit tonë në rrugëtimin evropian – marrjen e statusit të vendit kandidat, – nënvizoi rëndësinë që ka shkëmbimi i përvojës pozitive mes institucioneve homologe të avokatit të popullit në Evropë dhe më gjerë, me qëllim mundësimin dhe sigurimin e standardeve më të arrira e demokratike për qytetarët shqiptarë.
Presidenti vuri në dukje gjithashtu se hartimi i një legjislacioni bashkëkohor, zbatimi i tij pa u ndikuar nga politika, si dhe shoqërimi me mjetet financiare përkatëse, do të ndihmojë në krijimin dhe funksionimin e institucioneve të pavarura, efikase dhe transparente, të cilat janë dhe shtyllat e demokracisë.
