Romela Begaj triumfoi në peshën 63 kg, në botërorin e Almatisë në Kazakistan, por testet anti-doping kanë rezultuar pozitive për të, gjë që tashmë është një goditje për peshëngritjen shqiptare.
Federata Ndërkombëtare e Peshëngritjes, në faqen e saj zyrtare thekson se i është zbuluar një dozë e substancës stanozolol, për këtë shkak ajo pezullohet përkohësisht.
“Raportojmë se në mostrën e marrë nga shqiptarja Romela Begaj, është gjetur një dozë e substancës stanozolol. Për këtë arsye, atletja është pezulluar përkohësisht, për shkak të një shkelje të mundshme të rregullave për antidoping.
Në momentin që kjo do të përcaktohet, pas një analize B të mostrës ose një seance dëgjimore, do të publikohet vendimi nëse atletja ka shkelur rregullat ose jo”.
Ndërsa nga ana e kampiones Begaj nuk ka asnjë reagim për momentin.
