Tiranë, 9 prill, NOA - Zyrat e Regjistrimit të Pasurive lëshojnë tituj pronësie duke shkelur ligjin në mënyrë të hapur.
Një akuzë e tillë ndaj këtij organi u bë sot publikisht nga deputeti socialist, Marko Bello gjatë seancën plenare.
Sipas tij, sot Zyrat e Regjistrimit të Pasurive të Paluajtshme janë kthyer në xhungla, ku punonjës të korruptuar, me mbrojtjen e hapur të politikanëve në pushtet, marrin e shesin pronën e tjetrit, si ta kishin mallin e babait të tyre.
"Nga depozita apo magazina të ruajtjes së titujve të pronësisë, këto zyra janë kthyer në institucione që lëshojnë tituj pronësie, duke shkelur hapur ligjin dhe Kodin Civil, i cili përcakton qartë mënyrën e transmetimit të titujve të pronësisë: me kontratë, përmes trashëgimisë, dhurimit apo vendimit të gjykatës", tha Bello.
Duke shtuar se për shkak të korrupsionit skandaloz, vjedhjes dhe grabitjes së hapur, punonjësit e këtyre zyrave, kanë denatyruar misionin dhe funksionin që u ka parashikuar ligji, duke krijuar premisat për një konflikt social me përmasa të paparashikueshme, i cili do të kërkojë shumë kohë dhe një kosto tejet të lartë financiare për t'u zgjidhur.
"Në vend që këtë dëm kolosal financiar ta paguajnë shkaktarët e tij, pra zyrtarët e korruptuar të ZVRPP, janë sërish qytetarët e pafajshëm që iu është vjedhur prona, ata që detyrohen të enden në dyert e gjykatave për të zgjidhur çështjet që punonjësit e shtetit ua lënë peshqesh", shtoi ai.
n.e/NOA
