Berlin, 17 prill, NOA - Ja që ndodh edhe kështu. Ti kërkon të shpëtosh edhe jetën e një gjallese të vogël, por kjo të kushton punën dhe të ardhmen.
Kaq shtrenjtë e ka paguar respektin ndaj jetës së një bretkose që po kalonte rrugën, një shofere autobusi në Gjermani.
Ajo është larguar nga puna, pasi e ka ndalur autobusin për të shpëtuar një bretkosë, e cila kishte dalë në rrugë para mjetit të saj.
46-vjeçarja Christina Pommerel kishte punuar 13 vite për kompaninë gjermane "RBO" në Regensburg, para se të shkarkohej nga puna e saj, prej të cilës fitonte 1500 euro në muaj. "Ishte në mes të rrugës, prandaj e ndala autobusin, e vendosa bretkosën në një kuti, e largova nga rruga dhe e lëshova të shkonte. Pastaj hipa në autobus dhe e vazhdova udhëtimin. Unë kisha harruar për këtë gjë derisa menaxheti ma përmendi", tregon ajo e dëshpëruar.
Ndërsa sqaron më pas se njëri nga pasagjerët i ishte ankuar menaxherit dhe asaj i është dashur ta paguajë me largim nga vendi i punës gjestin human.
" Ata më thanë se është dashur ta shkel bretkosën dhe jo të ndalem. Kur u thashë se nuk mund ta bëja këtë gjë, ata më larguan", ka treguar Christina.
n.e/NOA
