Durrës, 18 maj/NOA - Një burrë i cili merrej me shitblerjen e lëndëve narkotike është prangosur sot në Durrës nga policia antidrogë.
Drejtoria rajonale e Policisë në Durrës, konfirmoi për korrespondentin e agjencisë së lajmeve NOA, arrestimin në orën 12.30 të ditës së hënë, të 46-vjeçarit Flamur Mema, lindur dhe banues në lagjen nr 9 në Durrës.
Seksioni kundër Narkotikëve tregoi se pas informacioneve të marra, organizoi punën dhe bëri të mundur kapjen në flagrance të Flamur Memës në lagjen nr 11 të qytetit bregdetar.
Ai u gjet me një sasi prej 12.20 gramë heroinë e ndarë ne 26 doza të cilën e mbante për qëllim shitjeje dhe që u sekuestrua nga policia, si provë materiale.
Nga verifikimi i të dhënave rezultoi se Flamur Mema ka qenë i dënuar më parë për veprën penale të "Prodhim dhe shitje lënde narkotike".
Me prangosjen e sotme, i dyshuari përballet me akuzën e "prodhimit dhe shitjes së lëndëve narkotike".
a.a/e.l/MOA
