Elbasan, 3 qershor NOA - Një 24-vjeçar është ndaluar nga policia e Elbasanit pasi ka shitur orenditë e banesës që kishte marrë me qira.
Burime nga policia thanë për agjencinë e lajmeve NOA se sot u krye ndalimi i 24-vjeçari Florenc Hida, banues në Elbasan, i dënuar për vjedhje.
Sipas policisë ndalimi i tij u krye sepse në lagjen "K. Elbasanit", në banesën me qira të shtetases Bukurie Çarçia, 54-vjeçe, ka shitur orenditë shtëpiake.
Mësohet se Hida prej disa muaj jetonte me qira në banesën e 54-vjeçares e cila ia kishte dorëzuar banesës bashkë me orenditë.
Pavarësisht se kontrata e pashkruar mes dy palëve ka parashikuar mirëmbajtjen e orendive nga ana e qiramarrësit, kjo nuk e ka penguar të riun ti nxjerrë në shitje ato dhe paratë t'i mbajë për vete.
Pas konstatimit të veprimit të qiramarrësit, gruaja ka denoncuar në polici duke e çuar në qeli 24-vjeçarin.
k.k/NOA
