Uashington, 13 qershor, NOA - Tre të burgosur të burgut të Guantanamos u transferuan në Arabinë Saudite "nën masat e nevojshme të sigurisë".
Ky lajm është konfirmuar nga Departamenti Amerikan i Drejtësisë, sipas të cilit ky akt shënon një hap tjetër drejt përmbushjes së planeve të presidentit Barck Obama për mbylljen e burgut famëkeq për të dyshuarit për terrorizëm.
Ai ka urdhëruar mbylljen e burgut në bazën detare amerikane në Kuba, ku vazhdojnë të mbahen ende 229 të burgosur.
"Të tre individët që u transferuan në Arabinë Saudite janë subjekt të një procesi të ri gjyqësor në Riad, përpara se t'i nënshtrohen një programi rehabilitimi", deklaroi Departamenti i Drejtësisë duke identifikuar edhe tre të burgosurit.
Bëhet e ditur se ata janë përkatësisht Khalid Saad Mohammed, Abdalaziz Kareem Salim Al Noofayaee dhe Ahmed Zaid Salim Zuhair, që të tre nga Arabia Saudite.
Transferimi i tre të burgosurve të fundit pason transferimin e gjashtë të burgosurve të tjerë këtë javë. n.e/NOA
