Tiranë, 17 Korrik NOA - Kryeministri Sali Berisha pret nëndrejtoreshën e zyrës rajonale të OBSH-së për Evropën, Nata Menabde.
Nata Menabde, është nëndrejtoreshë e zyrës rajonale të Organizatës Botërore të Shëndetësisë (OBSH) për Evropën.
Duke uruar Kryeministrin për fitoren e zgjedhjeve, zonja Menabde i vlerësoi ato si një hap të rëndësishëm për vazhdimin e reformave në vend dhe integrimin e tij në Bashkimin Evropian.
Zonja Menabde i përcolli Berishës, përshëndetjet më të ngrohta dhe vlerësimet më të mira nga drejtoresha e OBSH-së Margaret Chan dhe drejtori i zyrës rajonale të OBSH-së për Evropën dr. Marc Danzon për kontributin e Shqipërisë në këtë organizatë, si dhe vizitën e frytshme që ata patën në Shqipëri në mars të 2009.
Menabde, ka paraqitur kandidaturën për postin e drejtoreshës së zyrës rajonale të OBSH-së në zgjedhjet që do të zhvillohen në muajin shtator 2009.
Kryeministri Berisha falënderoi për vlerësimet dhe shprehu edhe një herë vendosmërinë për thellimin e reformave në shëndetësi, në përputhje këto dhe me parimet e Organizatës Botërore të Shëndetësisë.
/e.l/NOA/
