Elbasan, 28 korrik NOA - Gjykata e Rrethit Gjyqësor Elbasan ka lënë në burg dy të akuzuarit si autorë të dyshuar të vrasjes së ish-agjentit të drogës 42-vjeçarit Roland Rexhepi.
"Arrest me burg" ka qenë masa e dhënë sot nga gjykata e Elbasanit për dy të pandehurit Armand Llakaj 33-vjeç dhe Arben Jaçe 28-vjeç.
Dy të akuzuarit u arrestuan tre ditë më parë pasi dyshohet se janë autorët e vrasjes së ish-policit Roland Rexhepi.
Ky i fundit u qëllua mëngjesin e 22 korrikut pranë banesës së tij nga dy persona të maskuar të cilët pasi derdhën një breshëri automatiku në drejt të ish-agjentit të drogës u larguan me shpejtësi me një motor.
Policia e cila nisi hetimet intensive për të zbardhur motivet dhe autorët e vrasjes së kolegut të tyre, çuan në qeli një ditë pas krimit Armand Llakaj dhe Arben Jaçen si të dyshuar.
Mësohet se në seancën e sotme prokurori ka mbështetur në provat shkencore të administruara gjatë hetimit duke kërkuar masën e sigurisë "arrest me burg" për dy të pandehurit.
Por kërkesa e akuzës është kundërshtuar nga avokati mbrojtës i të dyshuarit Arben Jaçe duke deklaruar se klienti i tij në momentin e krimit ndodhej në Tiranë.
k.k/NOA
Â
