 Shkup, 25 gusht NOA-Ish kryeministri i Maqedonisë, Vllado Buçkovski ka akuzuar sot qeverinë e Gruevskit për politikë popullzimi në marrëdhëniet diplomatike me shtetet fqinje. Në një intervistë dhënë radios "Evropa e Lirë, Buçkovski ka deklaruar se  mosvendosja e marrëdhënieve diplomatike me Kosovën përkon me ngrohjen e marrëdhënieve të Shkupit me Beogradin.
Ai ka nënvizuar se në tre vjetët e kaluar, Maqedonia, si një nga liderët në rajon dhe një nga aleatët më të fuqishëm të Brukselit dhe Uashingtonit, është bërë shteti më i izoluar, i cili në pjesën e politikës së jashtme po bën shumë eksperimente.
"Në vend që deri në fund t'i realizojë premtimet që u dhanë pas formimit të qeverisë ndërmjet VMRO-DPMNE-së dhe Bashkimit Demokratik për Integrim për vendosjen e plotë të marrëdhënieve diplomatike me Kosovën, ne tash po shohim se nga gjithë kjo ka mbetur vetëm premtimi i kotë", ka thënë ish-kryeministri Buçkovski.
Sipas tij, Qeveria aktuale me sforcimin e "maqedonizmës" dhe kërkimin e rrënjëve te Maqedonia antike, po krijon një atmosferë shumë të brishtë.
"Përfundimisht po tregohet se për Qeverinë e Gruevskit, NATO-ja dhe Bashkimi Evropian nuk janë prioritet.", ka theksuar deputeti socialdemokrat.
