Tiranë, 5 shtator, NOA - Sapo ka filluar mbledhja e grupit parlamentar të Partisë Socialiste, e cila do të finalizojë në vazhdimësinë e saj vendimin përfundimtar nëse deputetët socialistë do të futen në Kuvendin e ri që nis punimet të hënën e ardhshme.
Sipas burimeve pranë socialistëve për agjencinë e Lajmeve NOA, takimi është duke u zhvilluar me dyer të mbyllura dhe se kryetari Rama tashmë e ka marrë fjalën e tij të hapjes dhe është duke u sqaruar të gjithë deputetëve të pranishëm në sallë se përse është e nevojshme masa e bojkotit të tyre ndaj parlamentit të ri, nëse nuk plotësohen më parë disa kushte.
Pritet në fakt një miratim i kësaj kërkese të kryetarit Rama, pasi ai gëzon mbështetje ndër radhët e deputetëve të rinj socialistë, të cilët i ka renditur në listën e kandidatëve për zgjedhjet e 28 qershorit.
Ndërkaq, Kryesia e Partisë Socialiste doli dje me vendimin për bojkotin e Kuvendit të ri, dhe pritet që ai të legjitimohet sot në mënyrë përfundimtare gjatë mbledhjes së sotme të grupit parlamentar të kësaj partie.
n.e/NOA
Â
