Tiranë, 5 tetor NOA - Inspektorët e ministrisë së Mjedisit kanë gjobitur jo pak por 30 lokale të cilat kanë shkaktuar ndotje akustike.
Në kuadër të ligjit, "Për vlerësimin dhe administrimin e zhurmës në mjedis", i cili ka për qëllim mbrojtjen e shëndetit dhe të mjedisit nga zhurmat, duke përcaktuar mënyrën e shmangies dhe masat për parandalimin, reduktimin dhe zhdukjen e efekteve të dëmshme të ekspozimit ndaj tyre, përfshirë dhe bezdinë nga zhurma, ministria e Mjedisit, Pyjeve dhe Administrimit të Ujërave ndërmori një aksion gjatë kësaj fundjave në lokalet e kryeqytetit.
Nga rezultatet e monitorimit të nivelit të zhurmave dhe kontrollet e ushtruara nga ana e ARM-së Tiranë, aktivitete të ndryshme rezultojnë të krijojnë probleme të ndotjes akustike në mjediset përreth.
Nga ARM-Tiranë në mbështetje nga Policia e Shtetit, Tirane gjatë fundjavës, u kryen kontrolle në lokale që shkaktojnë ndotje akustike dhe prishin qetësinë publike mbas orës 23:00.
Në këto lokale është ushtruar kontroll dhe më parë nga ana e ARM-së, duke i lënë detyrat përkatëse për masat që duhet të marrin për uljen e nivelit të zhurmës dhe pajisjen me lejen mjedisore përkatëse.
Gjatë këtij operacioni, u pezulluan dhe gjobitën një sërë lokalesh për shkelje të ligjit.
Mësohet se janë gjobitur rreth 30 lokale me shume prej 50 mijë lekë të reja.
k.k/NOA
