Tiranë, 23 tetor NOA Update - Viktima i gurores sot në periferi të Tiranës, gjeti vdekjen nga shpërthimi i eksplozivit që i plasi menjëherë sapo e aktivizoi për të zgjeruar vatrën e gërmimit por trupi i tij ende nuk po gjendet.
Fakti bëhet i ditur nga burime hetimore të policisë së Tiranës të cilat i thanë agjencisë NOA se viktima Reshat Dajti, një 46 vjeçar banues në fshatin Dajt Komuna Zall - Bastar, ishte punëtor në guroren në pronësi të shtetasit Bashkim Kuka.
Gurorja gjendet në Tufinë, në afërsi të tunelit të Brarës. Nga hetimet e kryera, rezulton se viktima ka qenë duke vendosur një sasi lënde plasëse në gurore dhe menjëherë më pas, është përfshirë në shpërthim, duke gjetur vdekjen e menjëhershme.
Policia dyshon shumë se kemi të bëjmë me një aksident i cili erdhi në rrethanat e shpërthimit të pakontrolluar të lëndës plasëse që po vendosej me qëllim zgjerimin e rrezes së përftimit në gurore.
Në vendin e ngjarjes ka shkuar një grup hetimor i përbërë nga ekspertë kriminalistë, xhenierë dhe oficerë të Policisë Gjyqësore, të cilët po hetojnë mbi rrethanat e kësaj ngjarjeje.
"Aktualisht po punohet për nxjerrjen e viktimës, pasi është i mbuluar tërësisht me një sasi dheu dhe gurësh", - i thanë gazetarit të NOA, burime policore në vendngjarje.
Ndërkohë, nga grupi i posaçëm hetimor i formuar, po hetohet për përgjegjësit administrativ dhe penalë, në drejtim të kushteve të sigurimit teknik në këtë gurore.
e.r/NOA
