VETEM PER ABONENTET
Luksemburg, 26 Tetor NOA - Shqipëria duhet mirëpritur në synimin e saj për të qenë pjesë e Bashkimit Evropian, ashtu si dhe vendet e tjera të Ballkanit Perëndimor.
Këtë deklaratë ka bërë sot Ministri i Jashtëm i Britanisë së Madhe, Dejvid Miliband."Ballkani Perëndimor, Turqia dhe Ukraina, që të gjithë e dëshirojnë anëtarësimin. Ne duhet t'i mirëpresim", - ka theksuar Miliband i cituar sot nga e përditshmja britanike "The Times".
"Unë bëj thirrje për zgjerimin e kufijve të Evropës në Lindje, për të përhapur demokracinë, aty ku dikur ka mbretëruar diktatura", - ka theksuar z.Miliband, duke iu referuar vendeve ish-komuniste, me diktatura të egra ku përfshihet Shqipëria.
Kurse ka vijuar: "Evropa ka buxhetin e dytë më të madh të ndihmave në botë, forcat ushtarake dhe të policisë po bëjnë një punë të jashtëzakonshme, pa marrë parasysh se a bëhet fjalë për luftën kundër piraterisë në Gjirin e Adenit, apo misionit për sundimin e ligjit në Kosovë".
Nga ana tjetër, z. Miliband ka sugjeruar se Bashkimi Evropian, si një organizëm me 27 shtete anëtare duhet t'i shndërrojë në prioritet marrëdhëniet e veta me Uashingtonin zyrtar, Pekinin dhe Moskën.
"Europa duhet të shndërrojë në prioritet marrëdhëniet e veta me fuqitë e mëdha dhe me fuqitë që po dalin në sipërfaqe: me SHBA-në në fushën e sigurisë, me Kinën në fushën e ndryshimeve klimatike, me Rusinë në fushën e energjisë. Na duhet një Europë, e cila do të shtojë angazhimin dhe të dëshmojë se mund të jetë një partnere serioze dhe strategjike", - ka nënvizuar z.Miliband.
Deklaratat e Miliban, një kandidaturë potenciale për të qenë ministër i Jashtëm i BE, vijnë në prag të samitit dyditor të udhëheqësve të Bashkimit Evropian që pritet të nisë të enjten në Bruksel.
/r.d/f.sh/NOA/ - Lexoni më shumë mbi argumentin:BE shqyrton kërkesën e Shqipërisë
