Tiranë, 16 nëntor NOA - Kryetarja e Kuvendit të Shqipërisë, Jozefina Topalli niset për në New York të Shteteve të Bashkuara të Amerikës, ku është e ftuar të marrë pjesë takimin e Unionit Ndërparlamentar në pallatin e OKB-së.
Kjo konferencë do të përbëjë takimin e dytë të Komitetit Përgatitor për Konferencën e Tretë Botërore të kryetarëve të parlamenteve, që pritet të mbahet në vitin 2010.
Dinamizimi i rolit të parlamenteve në sfidat botërore, prioritetet e Kombeve të Bashkuara, kriza financiare globale, forcimi i bashkëpunimit të parlamenteve mes tyre dhe Kombeve të Bashkuara, strategjitë e ardhshme politike dhe ekonomike ndërparlamentare, ndryshimet klimaterike do të jenë temat qendrore të diskutimeve të Konferencës.
Në këtë konferencë Topalli do të jetë bashkë me homologen e saj të Austrisë, Barbara Prammer, Kryetarin e Bundestagut gjerman Norbert Lammert, dhe Marc Laffineur, nënkryetar i parlamentit të Francës.
Të pranishëm do të jenë edhe anëtarë të parlamenteve të Australisë, Jordanisë, Indonezisë, Indisë, Kinës dhe Afrikës së Jugut.Â
Gjatë punimeve të Konferencës, Kryetarja e Kuvendit do të zhvillojë edhe takime të veçanta dypalëshe me Kryetarët e Parlamenteve, si edhe me personalitete të rëndësishëm të OKB-së.
k.k/NOA
