Prishtinë, 21 Nëntor NOA - Një e re nga Kosova humbi jetën sot pasi ishte prekur nga virusi i rrezikshëm AH1N1 që njihet ndryshe edhe si gripi i derrave.
Lajmin e konfirmuan burime zyrtare në Klinikën Infektive në Prishtinë të cilat thanë se H. H., 25-vjeçare nga Prizreni, ka vdekur sot, si pasojë e infektimit nga gripi i derrit.
Faik Hoti, zëdhënës i Ministrisë së Shëndetësisë, ka bërë të ditur se pacientja ishte shtruar këtë të mërkurë, në orët e pasdites në Klinikën Infektive, kurse tetë ditë më përpara ishte trajtuar në mënyrë ambulatore nga mjekët në Prizren.
Shemsedin Dreshaj, drejtor i Klinikës Infektive, ka shpjeguar se e sëmura ka ardhur në gjendje të rëndë klinike, me shenja të insuficiencës kardio-respiratore, me pleuro-pneumoni të anës së majtë dhe pneumoni të anës së djathtë.
"E sëmura tërë kohën ka qenë e trajtuar me Tamiflu, antibiotikë, kortizonikë, oksigjenoterapi, plus terapi tjetër mbështetëse", citohet Dreshaj, në një komunikatë të shpërndarë nga Ministria e Shëndetësisë.
Pacientja, të enjten pas mesnatës, për shkak të përkeqësimit kontinual të gjendjes është intubuar dhe është vendosur në respirator në Klinikën Infektive. "Përkundër terapisë së lartshënuar, gjendja e të sëmurës në mënyrë të përnjëhershme përkeqësohet të shtunën dhe në orën e 9: 50 minuta përfundon më vdekje me tablo klinike të një insuficiencë akute kardiorespiratore", thuhet në komunikatë.
Kjo është viktima e dytë nga virusi A/H1N1 në Kosovë. H. E, 31 vjeçar, nga fshati Baincë i Drenasit, vdiq të shtunën e kaluar, më 14 nëntor.
Edhe ai ishte paraqitur te mjeku me vonesë, pas rreth dy javë e gjysmë, pasi i ishin paraqitur shenjat e para të gripit.
Ministria e Shëndetësisë dhe mjekët u bëjnë thirrje qytetarëve që të kontaktojnë me mjekun e familjes, sapo të vërejnë shenja të dyshimta të gripit, sepse paraqitja me vonesë e bën të diskutueshëm mjekimin e plotë të rasteve të rënda.
a.b/NOA
