Tiranë, 25 nëntor NOA - Tre persona u arrestuan dje nga policia pasi akuzohen se kanë çarë murin e një dyqani të Këmbimit Valutor me qëllim vjedhjen e tij.
Elton Beluli, 21-vjeç, Elmaz Alimadhi, 26-vjeç dhe Ilir Kotorri, 32-vjeç, të tre nga Korça u arrestuan dje pasi dyshohen se në bashkëpunim me njëri-tjetrin, janë autorë të vjedhjes së mbetur në tentativë të dyqanit Këmbim Valute, në pronësi të një shtetasi në rrugën "Xhorxh Bush" në Tiranë, ku kanë bërë të mundur hapjen e murit, por nuk kanë arritur të vjedhin.
Nga puna e bërë nga Specialistët e komisariatit nr.1, u bë i mundur dokumentimi i ngjarjes të datës 17 nëntor të këtij viti kur tre korçarët në rrugën "Fadil Rada" në kryeqytet, kanë vjedhur dy pasqyra të një mjeti tip-Benz, me targë CT 057 MD.
Në cilësinë e provës materiale u sekuestruan një varëse sermi, një thikë, katër aparate telefoni celularë, një shumë e konsiderueshme parash, një sqeparë dhe dy leva hekuri.
Materialet ne ngarkim të tyre i kaluan prokurorisë, për veprën penale të "vjedhjes"
e mbetur në tentativë, e kryer në bashkëpunim, dhe "prodhim dhe mbajtje e armëve të ftohta".
k.k/NOA
