Durrës, 8 dhjetor NOA - Një studente 21-vjeçare ka rënë nga dritarja e katit të pestë të një pallati në qytetin e Durrësit.
Ngjarja ndodhi pak pas mesnatës duke u gdhirë dita e sotme në lagjen Nr.1 në Durrës kur studentja e fakultetit "Aleksandër Moisiu" ka rënë nga dritarja e katit të pestë ku banonte në një pallat 8-katësh.
Dy shoqet me të cilat studentja nga Bulqiza ndante qiranë e apartamentit alarmuan menjëherë policinë.
Forca të shumta policie mbërritën në vendin e ngjarjes dhe transportuan drejt spitalit të Durrësit studenten e cila kishte ende shenja jete.
Pasi ka marrë mjekimet e para në spitalin e Durrësit, e dëmtuara u dërgua për mjekime më të specializuar në Spitalin ushtarak në Tiranë.
Ndërkohë që policia ka nisur hetimet për të zbardhur rrethanat e rënies së studentes nga kati i pestë.
Nga hetimet e para dyshohet se vajza është hedhur vetë duke tentuar vetëvrasjen megjithatë ende nuk dihen motivet që do të verifikonin këtë dyshim të policisë, e cila theksoi se do të merren në pyetje shoqet e 21-vjeçares.
k.k/NOA
Â
