Genova, 27 Dhjetor NOA - Një emigrante shqiptare ka përjetuar minuta të frikshme mëngjesin e sotëm kur u sulmua me qëllim përdhunimin, nga një mashkull i cili e dhunoi por nuk arriti të përfundojë aktin e synuar pasi vajza arriti të shkëputej. Korrespondentja e agjencisë NOA informon se ngjarja u raportua sot në policinë e Xhenovës (Genova) nga 24 vjeçarja, një shqiptare, emigrante prej disa vitesh në Itali, me leje të rregullt qëndrimi.
E dëmtuara i tregoi policisë në kallëizmin që depozitoi, se në orën 05.30 të mëngjesit ndërsa kthehej nga turni i natës në punë, afër shtëpisë në këtë qytet, iu sul një mashkull i cili mbetet i paidentifikuar.
24-vjeçarja tha se agresori i mbylli gojën me duar me qëllim që të mos klithte dhe ndërkohë ushtroi dhunë fizike, duke dashur ta përdhunojë.
Një forcë fizike e papritur i ka dalë 24-vjeçares e cila ka gjetur fuqi ta shtyjë në precipitim e sipër të situatës agresorin e saj dhe ka vrapuar.
Në arrati e sipër, ajo ka përplasur kokën në asfalt duke mbetur e dëmtuar aty, kurse autori është zhdukur me shpejtësi.
E plagosura u dërgua në spitalin lokal ku edhe iu mor denoncimi. Mjekët thanë se ajo është jashtë rrezikut për jetën.
j.s/e.r/NOA
