Pogradec, 4 Janar NOA Alba Filipi/ - Një person ka gjetur vdekjen në rrethana ende të paqarta dhe trupi i tij u gjet sot nga një grup peshkatarësh në ujërat e liqenit të Pogradecit, ndërkohë që po peshkonin me rrjeta, informon korrespondentja e agjencisë NOA.
Në vendngjarje ka mbërritur policia e cila tha se mori në pyetje tre peshkatarë. Ata kanë treguar se ishin duke u përpjekur të zinin peshk me rrjeta dhe teksa po e tërhiqnin njërën prej tyre kur gjendeshin në varkë, papritur në sipërfaqe doli trupi i një mashkulli.
Policia dhe ekspertët e saj bënë të ditur se trupi ishte i dekompozuar. Bëhet fjalë për një mashkull në moshë ende të pacaktuar.
Ajo që i mbetet policisë aktualisht, është të verifikojë personat e shpallur të zhdukur në rajonin e Korçës, kurse vetë peshkatarët i druhen mundësisë që viktima të jetë një prej ish-kolegëve të tyre.
a.f.r.b/NOA
