>> Rama: Jo farsës parlamentare
>> Berisha, përgjigja vjen nga Shkodra
Lajmi ritransmetohet me foto
Tiranë, 17 janar NOA - Deputeti i Partisë Socialiste, Ben Blushi do të thyejë ‘akullin" për të shkelur sipas gjasave i pari nga PS në Parlament. Një fakt të tillë e ka bërë të ditur vetë deputeti i opozitës dhe njëkohësisht anëtar Lëvizjes për Mendimin Ndryshe në PS, Ben Blushi sot pas përfundimit të Asamblesë së PS-së.
Blushi deklaroi se në fillim të muajit mars do të bëhet pjesë e Parlamentit duke thyer kështu bojkotin e opozitës pasi sipas tij bojkoti rezultoi një strategji e gabuar.
"Asambleja duhet të diskutonte për bojkotin që rezultoi një strategji e gabuar. Unë nuk do djeg mandatin tim" u shpreh Blushi. Blushi kërkoi që çështja e bojkotit të diskutohet në Asamblenë e PS: "Do të propozoja që pasi të mbarojnë fjalimet dhe prezantimet për përmbytjen, Asambleja të ketë një pikë në rendin e ditës ku të diskutojë se çfarë do të bëjmë në të ardhmen tonë. Kemi hyrë në një vit tjetër dhe kërkohet që të bëjmë një bilanc të paktën të 6 muajve të fundit", deklaroi sot Blushi në fillim të mbledhjes. ***
Një ndër emrat kryesorë të Lëvizjes për Mendimin Ndryshe në Partinë Socialiste, deputeti Ben Blushi, në fjalën e tij i vuri theksin çështjes së bojkotit parlamentar, duke kërkuar që Asambleja e kësaj partie që po i vazhdon punimet, të shtrojë për diskutim pas çështjes së përmbytjeve edhe atë të rikthimit të opozitës në parlament.
Ben Blushi e mori fjalën fill pas Ruçit në mbledhjen e Asamblesë duke kërkuar që rendi i ditës të ketë si pikë të saj sot edhe bojkotin ende në fuqi.
"Pasi të përfundojnë diskutime për përmbytjen dhe situatën që u krijua prej tyre, në rendin e ditës duhet të jetë edhe bojkoti i parlamentit dhe hapat e tjerë që do të duhet të marrim në vazhdim", - deklaroi Blushi.
"Ne duhet të bëjmë një bilanc të rreth gjashtë muajve të fundit dhe të dalim me një vendim pasi arsyet për të bojkotuar parlamentin nuk janë më të justifikueshme", - deklaroi z.Blushi.
***
Punimet e Asamblesë Kombëtare të Partisë Socialiste i ka çelur kryetari i kësaj asambleje Gramoz Ruçi, i cili u ndal në përmbytjet e ndodhura në Shkodër dhe Lezhë, duke akuzuar qeverinë se ajo ishte fajtore dhe jo situata e motit që solli emergjencën humanitare.
"Qeveria e paaftë, ishte ajo që solli dëmin e madh për shkodranët", - deklaroi Ruçi kurse shtoi: "Përmbytjet erdhën pasi argjinaturat e lumenjve nuk i ka Zoti në dorë, por i pazoti, se kanalet e kullimit nuk i la Zoti të papasatruara por i lanë të pazotët, sepse inertet tek lumenjtë nuk i la Zoti por i lanë të pazotët, që janë Sali Berisha me njerëzit e tij".
Në fjalën e tij, Ruçi ka shprehur dhe admirimin siç u shpreh, për banorët që përballuan këtë katastrofë.
Më tej, z.Ruçi tha se Partia Socialiste, solidarizohet me të dëmtuarit nga përmbytjet", kurse vuri në dukje se deputetët socialistë, dhanë kontribut të çmuar në Shkodër".
***
Asambleja Kombëtare e Partisë Socialiste nisi sot punimet e drejtuar nga kryetari Gramoz Ruçi, duke pasur në qendër të saj, çështjen ende aktuale të situatës së emergjencës humanitare të përmbytjeve në Shkodër dhe Lezhë por edhe situatën politike që lidhet me përplasjet që PS ka me qeverinë lidhur me votimet e 28 qershorit.
Lëvizja për Mendimin Ndryshe po merr pjesë në këtë asamble dhe pritet të flasin emra të njohur të saj si Ben Blushi.
k.k/NOA
Lexoni më shumë mbi argumentin:
>> Rama: Jo farsës parlamentare
>> Berisha, përgjigja vjen nga Shkodra