Tiranë, 20 Janar NOA - Avioni i linjës Tiranë-Torino, i kompanisë "Albania Airlines", me të cilin po udhëtonin 100 pasagjerë, ka bërë ulje të detyruar sot pasdite, pas 70 minutash fluturimi në ajër.
Lajmi u bë i ditur përmes telefonatave nga disa pasagjerë dhe u konfirmua për agjencinë NOA nga burime zyrtare të aeroportit të Tiranës, "Nënë Tereza" në Rinas.
Kështu, brenda katër ditëve shënohet incidenti i dytë ajror, me linjat e fluturimit të kompanisë "Albania Airlines".
Sipas pasagjerëve, avioni është nisur me 2 orë vonesë dhe më pas nuk ka përfunduar në destinacion.
Autoritetet e kompanisë ajrore "Albania Airlines", kanë shpjeguar se ulja ka qene e detyruar për shkak të një defekti.
Ndërkaq mësohet se pas uljes në Rinas, shëndeti i të gjithë pasagjerëve ka qenë i mirë. Këta të fundit kanë kërkuar shpjegim për këtë incident, si dhe t'u vihej në dispozicion një tjetër avion për të shkuar në destinacion.
e.r/NOA
