Tiranë, 23 janar, NOA - "Frika" se mos dështon ndeshja ashtu siç ndodhi me atë mes ekipit të Realit të Madridit dhe atij të Gramozit pak ditë më parë, ka bërë që drejtuesit e stadiumit "Qemal Stafa" ta caktojnë derbin mes Tiranës dhe Dinamos, të programuar për të hënën në orën 18.00, në orën 14;00 të kësaj dite. Dhe kjo pasi, stadiumi është ende pa drita që nga dita e atij që u quajt "skandal".
Lajmin e ka bërë të ditur Federata Shqiptare e Futbollit, e cila ka rënë dakord me klubet për këtë ndryshim të orarit.
Stadiumi "Qemal Stafa" është ende pa energji elektrike, pasi transformatori i djegur në mesin e ndeshjes Gramozi-Real Madrid nuk është zëvendësuar për shkak se zona është nën mbikëqyrjen e Prokurorisë.
Kabina e stadiumit konsiderohet vendi i ngjarjes dhe organi i akuzës ka bërë të ditur se aty nuk mund të bëhet asnjë veprim pa mbaruar ekspertiza e plotë e shkaqeve që çuan në djegien e transformatorit të mërkurën në mbrëmje.
n.e/NOA
