Los Anxhelos, 30 Janar NOA - Ceremonia e ndarjes së çmimeve Grammy Awards do të zhvillohet ditën e dielë në Los Anxhelos ku me këtë okazion do të bëhet dhe një ceremoni për legjendën e popit Michael Jackson.
Aty do të shfaqet filmi me metrazh të shkurtër " Earth Song" në nder të tij, po lajmi që po bën më shumë bujë dhe është shpërndarë në të gjithë rruzullin tokësor është ai që fëmijët e këngëtarit respektivisht Prince Michael 12 vjeç, Paris 11 vjeç dhe Prince Michael II 7 vjeç do të jenë në skenën e këtij evenimenti madje pritet se ata do të këndojnë një këngë të babait të tyre në nder të tij.
Gjyshja e fëmijëve Katherine Jackson, e cila është dhe kujdestarja e tyre ligjore sipas burimeve të medieve amerikane është duke përgatitur një performancë të fëmijëve pikërisht në Grammy Awards.
Vetë legjenda e popit Michael Jackson ka bërë prezantimin e "Monnwalk" për herë të parë në skenat e Grammy dhe do të ishte gjëja më e drejtë që dhe fëmijët e tij të bënin prezantimin e tyre pikërisht në këtë skenë.
Tashmë nuk ngelet gjë tjetër veçse të pritet ky eveniment për të parë homazhet që do të bëhen në nderim të Michael Jackson.
r.b/NOA
