Shkodër, 25 shkurt, NOA - Strukturat e Forcave të Armatosura, ku përfshihen ato Tokësore, Ajrore, Brigada e Mbrojtjes Rajonale etj, po angazhohen për të ndihmuar zonat e përmbytura në kuadrin e situatës së emergjencës në qarkun e Shkodrës. Në këtë kuadër, ata po ndërmarrin evakuimin e njerëzve dhe gjësë së gjallë nga zonat e përmbytura, ndërtimin e kampingjeve për strehimin e popullsisë, hapjen e rrugëve dhe transport inertesh, përmirësimin e infrastrukturës rrugore në zonat e dëmtuara, përforcimin e argjinaturave, përmirësimin e infrastrukturës në zonat e përmbytura si edhe transportimin dhe shpërndarjen e ndihmave ushqimore.
Të gjitha forcat dhe mjetet ushtarake janë përqëndruar në një komandë të vetme në Batalionin e Këmbësorisë Malore në Vaun e Dejës.
Në zonën e operacionit janë përqendruar 192 forca: 17 mjete transporti, 10 mjete të rënda (5 astra, 2 fadroma, 2 eskavatorë, 1 vinç); 17 motobarka dhe barka (13 motobarka dhe 4 barka) dhe 2 ambulanca; 1 qendër mobile për mbështetje me komunikim të operacionit nga bnd. Për datën 24.02.2010 u aktivizuan 196 forca, 10 mjete të rënda dhe 10 varka në zonat: Bashkia Shkodër, komuna Dajç dhe komuna Bushat.
n.e/NOA
