Bishkek, 19 prill, NOA - Kirgistani është përfshirë sërish nga trazirat, ndërsa presidenti i përmbysur i këtij vendi, Kurmanbek Bakijev, u deklarua se u largua nga vendi i tij dhe një qeveri e përkohshme e opozitës ka marrë në dorë situatën.
Presidenti i përmbysur, Bakijev, ka shkuar në Kazakistan, tetë ditë pasi ai ishte detyruar të largohej nga kryeqyteti Bishkek, për shkak të trazirave të dhunshme.
Por duket se trazirat nuk qenkan ndalur këtu, ndërsa mbështetësit e presidentit të përmbysur të Kirgistanit, janë tubuar sot në qytetin jugor Xhalal-Abad.
Raportohet se në sheshin kryesor të këtij qyteti ishin tubuar afro 1500 vetë, që mbanin mbishkrime kundër qeverisë së përkohshme.
Mbështetësit e Kurmanbek Bakijevit, lirisht hynin në ndërtesën rajonale të qeverisë. n.e/NOA
