Lezhë, 20 prill, NOA - Një situatë mjaft e rënduar është krijuar mëngjesin e sotëm në qarkun e Lezhës dhe zonën e Nënshkodrës për shkak të reshjeve të shiut, të cilat kanë qenë të konsiderueshme gjatë gjithë orëve të natës.
Si pasojë e tyre, me dhjetëra shtëpi janë përmbytur, ndërkohë që niveli i ujit ka arritur në 1.5 metra dhe rrugët janë bllokuar për shkak të ujit duke vështirësuar lëvizjen e banorëve.
Një panoramë më të plotë të kësaj situate emergjence të krijuar në qarkun e Lezhës e tregon fakti se të gjitha shkollat janë mbyllur pasi ato janë plotësisht të përmbytura.
Ndërsa në Shkodër, referuar të dhënave nga shtabi i emergjencës njofton se më serioze paraqitet në fshatin Arren ku 6 banesa rrezikojnë seriozisht përmbytjen dhe në komunën Ana e Malit ku është dëmtuar rëndë nënstacioni i pompave duke lënë banorët e zonës pa ujë të pijshëm për orë të tëra.
Dhe si në muajin janar, komuna e Dajçit, paraqet probleme përmbytje, ku një pjesë e fushës në fshatin Dragushë është e mbuluar me ujë, por për fat të mirë, rrugët janë të kalueshme.
n.e/NOA
