Lajme Shkurt Nga Rrethet-Kronika
Durrës, arrestohet 20 vjeçari, plagosi me kacavidë dy shtetas
Forcat e policisë të Durrësit arrestuan në orët e para të ditës së sotme 20-vjeçarin Armando Psatha, i cili mesnatën e kaluar plagosi rëndë një 46-vjeçar pas një grindjeje për motive të dobta, ndërsa një 21-vjeçar u dëmtua lehtë.
Sipas burimeve të drejtorisë së Policisë së Qarkut, ngjarja ka ndodhur sot rreth orës 01.45 në rrugën Unazë Plepa-Shkozet, kur pas një konflikti të çastit 20-vjeçari Psatha ka goditur në fyt me kaçavidë 46-vjeçarin Sh. K., banues në lagjen periferike të plazhit, i cili është transportuar në Spitalin Ushtarak në Tiranë dhe vazhdon të jetë nën kujdesin e mjekëve. Në ngjarje ka mbetur i plagosur lehtë edhe 21 vjeçari E.K, banues në lagjen e Plazhit. /g. kabashi/
Shkodër, vetëvritet me armë zjarri një 38 vjeçar
Një 38 vjeçar, banues në fshatin Grudë e Re, të komunës së Rrethinave, në rrethin e Shkodrës, është vetëvrarë ditën e sotme me armë zjarri, tip pistolete pranë banesës së tij. Burime zyrtare nga policia e Shkodrës bënë të ditur për ATSH-në se grupi hetimor, i cili shkoi menjëherë në vendngjarje, nga veprimet e para hetimore ka konkluduar se viktima Agron Isufi ka kryer vetëvrasjen në tokën e tij.
Nga ana e policisë po kryen të gjitha veprimet e duhura proceduriale e hetimore dhe po punohet për zbardhjen e plotë të motivit dhe rrethanave të ngjarjes./g. marku/
Pukë, arrestohet 36 vjeçari, goditi një punonjës policie
Një 36 vjeçar, banues në qytetin e Fushë Arrësit, në rrethin e Pukës është arrestuar sot nga forcat e policisë së Pukës pasi goditi në gjendje të dehur një punonjës policie. Burime zyrtare nga Komisariati i Policisë së Pukës thanë për ATSH-në se 36 vjeçari Petrit Ndoci, në dalje të qytetit të Fushë Arrësit, në gjendje të dehur, ka goditur me grushta shtetasin E. D. , 24 vjeç, me detyrë punonjës i policisë së qarkullimit rrugor./g.marku/
/s.s./
