Iran - Mussavi Denoncon Sanksionet Dhe Aventurizmin E Pushtetit Në Politikën E Jashtme
TEHERAN, 24 maj /ATSH-AFP/- Një nga figurat e opozitës iraniane, Mir Hossein Mussavi denoncoi sërish sanksionet që kërkojnë të vendosin fuqitë e mëdha kundër Iranit për politikën e tij bërthamore dhe aventurizmin e qeverisë në politikën e jashtme, u njoftua sot në faqen e tij të internetit ''kaleme.com''.
"Këto ditë është folur për sanksione kundër kombit tonë. Ne mendojmë se situata aktuale rezulton si një menaxhim i dobët nga qeveria në politikën e jashtme, por ne nuk mund të jemi dakort me sanksionet që mund të prekin jetën e njerëzve'', deklaroi Mussavi gjatë një takimi me familjet e ushtarëve të vrarë gjatë luftës Iran-Irak (1980-88).
Pas disa muajsh diskutime, SHBA-ja arriti të bindë Kinën dhe Rusinë për të mbështetur projektrezolutën e Këshillit të Sigurimit të OKB-së për sanksione të tjera kundër Iranit./
/ec/
