Tiranë, 24 maj, NOA – Zbatimi i ligjeve, vendimmarrja dhe kalimi i financimeve për shoqërinë civile nga ato të huaja në vendore do të jenë tema e një takimi që do të zhvillohet nesër nga prezenca e OSBE-së në Tiranë.
Zyra e shtypit të OSBE-së njofton se drejtuesit e institucionit në Shqipëri, në bashkëpunim me Delegacionin e Bashkimit Evropian, organizojnë konferencën për shoqërinë civile, në të cilën do të marrin pjesë përfaqësues të shoqërisë civile, organizata jo-qeveritare, zyrtarë të qeverisë qendrore e vendore dhe donatorë.
“Në konferencë do të trajtohen çështje të tilla si përmirësimi dhe zbatimi i legjislacionit, rritja e pjesëmarrjes së publikut në procesin e vendimmarrjes, rritja e përgjegjshmërisë dhe imazhit të organizatave të shoqërisë civile dhe kalimi i pronësisë nga donacionet e huaja te burimet vendore”, thuhet në njoftim.
Në këtë takim do të flasin ambasadori Robert Bosch, dhe Kreu i Delegacionit të BE-së, ambasadori Helmuth Lohan. Takimi do të zhvillohet në në orën 9.30, në “Tirana International Hotel”, salla “Balsha”.
m.xh/NOA
