Tiranë, 25 maj, NOA, Update – Ka zgjatur rreth 60 minuta takimi në Presidencë mes Kryetarit të Partisë Socialiste, Edi Rama dhe Presidentit të vendit, Bamir Topi.
Në përfundim të takimit, kreu i PS-së, Rama nuk ka pranuar të flasë për mediat e pranishme. Ndërsa pritet që ai të japë një konferencë për mediat në selinë e Partisë Socialiste.
Ndërkohë, Presidenca ka nxjerrë një njoftim të shkurtër për mediat ku deklaron se qëllimi i takimit ka qenë për situatën politike në vend, duke mos dhënë detaje të tjera.
“Presidenti i Republikës, Prof. Dr. Bamir Topi priti sot me kërkesën e tij Kryetarin e Partisë Socialiste, Edi Rama. Situata më e fundit politike në vend ishte temë kryesore e bisedës kokë më kokë të zhvilluar në zyrën e Kryetarit të Shtetit”, thuhet në njoftimin e Presidencës në lidhje me takimin.
m.xh/NOA
