Hillary Clinton Mbërrin Në Korenë E Jugut Në Mes Të Krizës
SEUL, 26 maj /ATSH-AFP/ - Sekretarja amerikane e Shtetit, Hillary Clinton, mbërriti sot në Seul, pas një vizite në Pekin, në etapën e fundit të turneut të saj një javor në Azi, në mes të krizës në gadishullin korean, njoftoi AFP-ja.
Clinton mbërrin në Seul ndërkohë që Koreja e Veriut vendosi dje të ndërpresë marrëdhëniet me Korenë e Jugut të cilën e kërcënon me "fillimin e luftës" nëse do t'i vendosen sanksione të reja.
Pheniani kërcënoi sot me mbylljen e një pjese të kufirit me Jugun nëse Seuli rifillon propagandën kundër Veriut, njofton agjencia zyrtare KCNA.
Në Pekin, Clinton arriti të siguronte që Kina, aleati i vetëm me influencë i Phenianit, të pranojë "bashkëpunimin" me Shtetet e Bashkuara përballë krizës së re koreane.
Koreja e Veriut është akuzuar nga hetues ndërkombëtarë se ka shkaktuar në fund të marsit mbytjen e anijes së luftës Cheonan, në Detin e Verdhë që solli vdekjen e 46 personave mes marinarëve koreanojugorë.
/I.Pu.
