Sport-Futboll/ Besnik Hasi Refuzon Pankinën E Cercle Bruzh
TIRANË, 28 Maj /ATSH- Gjergji Mima/ - Ish-futbollisti i kombëtares shqiptare, Besnik Hasi, ka refuzuar ofertën e zyrtarëve të klubit Cercle Bruzh për të marrë drejtimin e kësaj skuadre.
38-vjeçari ishte zgjidhja e parë e kryesisë së klubit për të zëvendësuar trajnerin Glen de Boeck që dha dorëheqjen javën e kaluar.
Menjëherë pas dorëheqjes së tij, drejtuesit e Cercles kanë kontaktuar Hasin. Pas refuzimit të Hasit, Cercle për trajner ka zgjedhur Bob Petersin. Aktualisht, kosovari Hasi është ndihmëstrajner i parë në klubin më të madh belg, Anderleht.
"Unë isha kandidati i parë për trajner të Cercles. Natyrisht, interesimi i tyre më nderon, por unë kam edhe dy vite kontratën me Anderlehtin. Për këtë arsye kam refuzuar ofertën e tyre", ka thënë Hasi për mediat belge.
Hasi e mbylli karrierën si futbollist pikërisht në skuadrën e Cercle Bruzh. Për këtë skuadër luajti në edicionin 2007/2008. Më pas iu bashkua stafit teknik të Anderlechtit.
Hasi këtë edicion me Anderlehtin ka fituar titullin e kampionit të Belgjikës. Si futbollist ka luajtur edhe për Anderlechtin, Genkun e Lokerenin në Belgjikë. Karrierë ka bërë edhe në Gjermani, Kroaci e Kosovë. /a.ke/
