Kosove - Ministri I Drejtesise Ne Bullgari Per Thellimin E Bashkepunimit
PRISHTINË, 29 Maj /ATSH-B.Jashari/.- Ministri i Drejtësisë së Republikës së Kosovës, Haki Demolli, ndodhet për vizitë në Sofje, me qëllim thellimin e bashkëpunimit me Ministrinë e Drejtësisë së Bullgarisë.
Ministra kosovare bën të ditur sot se Demolli është pritur nga zëvendësministri i Drejtësisë së Bullgarisë, Hristo Angelov dhe nga Drejtori i Departamentit për Bashkëpunim Juridik
Ndërkombetar në Bullgari, Borislav Petkov.
Në këtë takim, ministri Demolli i dorëzoi zëvendësministrit Angelov Propozim-marreveshjen për Bashkepunim Juridik Ndërkombëtar në Çështjet Penale, Propozim-marreveshjen për Ekstradim dhe Propozim-marreveshjen për Transferim të Personave të Dënuar.
"Zëvendësministri Angelov, duke çmuar iniciativën e palës kosovare për të filluar negociatat me palën bullgare, lidhur me arritjen e marrveshjeve në fushën e bashkëpunimit juridik ndërkombëtar, shprehu gatishmërinë e tij që Ministria e Drejtësisë së Bullgarisë t'i ofrojë mbështetje dhe bashkëpunim Ministrisë së Drejtësisë së Kosovës", theksohet në njoftim.
Në vizitën në Bullgari, ministri Demolli po shoqërohet nga ambasadorja e Kosovës në Sofje, Ariana Zherka dhe nga Ehat Miftaraj, udheheqës i Divisionit për Bashkëpunim Juridik Ndërkombëtar në Ministrinë kosovare të Drejtësisë. /a.ke/
