Prishtinë, 29 Maj, NOA – Beogradi zyrtar po bën lobing në mënyrë të përshpejtuar pranë qarqeve ndërkombëtare për ndarjen e Kosovës, kryesisht duke e përqendruar vëmendjen te Shtetet e Bashkuara të Amerikës.
Një fakt të tillë e ka bërë me dijeni përfaqësuesja e serbëve të Kosovës, Rada Trajkoviç, e cila në një intervistë për revistën “Press”, ka pohuar se Beogradi zyrtar është duke ndjekur dy politika, një për veriun e Kosovës dhe një tjetër për jugun e saj.
“Sipas njohurive të mia, këtë projekt Serbia është duke u përpjekur që ta jetësojë nëpërmjet kabinetit të presidentit amerikan, Barak Obama”, mësohet të ketë thënë Trajkoviç.
Sipas saj, Serbia kurrë nuk ka hequr dorë nga politika për ndarjen e Kosovës.
Dhe ka përmendur një detaj, kur shumë vite më parë, ndërsa ajo ishte në SHBA, kishte dëgjuar se Dick Cheney, i kishte ofruar Koshtunicës “njohjen e territorit poshtë Ibrit, për territorin mbi Ibër”.
n.e/NOA
