Fushe Krujë, Sekuestrohet Një Asenal Armësh, Arrestohet 35 Vjeçari
DURRËS, 30 Maj/ATSH-G. Kabashi/.- Një 35 vjeçar nga fshatrat e Fushë Krujes u arrestua sot në mbrëmje nga policia pasi në lokalin dhe në banesën e tij janë gjetur një arsenal armësh dhe municionesh.
Burime zyrtare nga Drejtoria e Policisë e Qarkut të Durrësit bënë të ditur për ATSH-në se Agron Topalli, banues në fshatin Tapizë, 3 km larg Fushë Krujës, i cili ishte dënuar edhe më parë për dhunë në familje, u arrestua pas kontrollit të ushtruar në banesën dhe lokalin e tij, ku u gjetën dhe sekuestruan tre armë automatike, tre pistoleta tip stilolaps, një arkë me tritol, 625 fishekë si dhe disa armë të ftohta.
Aksioni u krye nga forcat e policisë së Krujës, në bashkëpunim me forcat e Drejtorisë së Policisë së Qarkut të Durrësit, pas informacioneve të siguruara në rrugë operative./s.s./
