Prishtinë, 30 maj, NOA - Organizata e Veteranëve të Luftës (OVL) e Ushtrisë Çlirimtare të Kosovës (UÇK) ka ftuar qytetarët e Kosovës që sot të marrin pjesë në një protestë paqësore në Mitrovicë, raportojnë mediat kosovare.
Protesta me moton “Të mbrohet sovraniteti i Kosovës”, zhvillohet për të kundërshtuar shkeljen e vazhdueshme të sovranitetit të Kosovës dhe mbajtjen e zgjedhjeve të Serbisë në Mitrovicë.
Zgjedhjet serbe janë kundërshtuar dhe nga shoqatat e pavarura të cilët e kanë cilësuar këtë si shkelje të të drejtave ndërkombëtare.
Lëvizja “Vetvendosje” ka përkrahur protestën e veteranëve gjatë një konference të bërë dy ditë më parë në Mitrovicë.
Ndërsa ndërkombëtarët kanë lënë të kuptohet se zgjedhjet janë të pavlefshme.
Nga ana tjetër KFOR-i u ka bërë thirrje të gjithë qytetarëve që protesta të jetë paqësore, ndërsa ka paralajmëruar se do të ndërhyjë nëse do të ketë veprime të dhunshme.
KFOR-i i inkurajon të gjithë qytetarët që ta përdorin këtë të drejtë në mënyrë paqësore dhe të qëndrojnë larg nga çfarëdo grupi apo aktiviteti të dhunshëm.
m.xh/NOA
