Gjirokaster: Deputetet Bulku Dhe Doda Takim Sensibilizues Me Grate E Lazaratit
GJIROKASTËR, 1 Qershor/ATSH, Telnis Skuqi/ - Deputetet e PD, Rajmonda Bulku e Mesila Doda zhvilluan sot pasdite një takim me gratë e Lazararit, të cilave u kërkuan që të bëhen barriera dhe kontribuese në ç'rrënjosjen e kultivimit të bimëve narkotike në këtë fshat.
Mesila Doda theksoi se sivjet, ndryshe nga vitet e fundit kur Lazarati ka pasur dukurinë problemore për mbjelljen e bimëve narkotike, gjërat po ndryshojnë në sensin pozitiv.
Duke nënvizuar se gratë, që janë gjysma e popullsisë, është dhe pjesa më e fortë e saj, Doda tha se "do të bëhemi një barrierë e fuqishme kundra dëshirave, kundra çmendurirave shumë herë që mund të kenë burrat, baballarët, vëllezërit, fëmijët tanë, sepse ne jemi ndërgjegjia e familjes".
Ndërsa deputetja Rajmond Bulku e cilësoi zëri i gruas një potencial të fuqishëm, jo vetëm në familje, por edhe në shoqëri. "Ju duhet të kontribuoni që rruga për në Lazarat të jetë e hapur, e sigurt për turistët dhe këdo, ndaj me forcën tuaj duhet të mbroni të ardhmen e fëmijëve tuaj, që ndërtohet vetëm me punë të ndershme, duke larguar përfundimisht nga territoret tuaja bimën e vdekjes", tha ajo.
Një javë më parë fshatin Lazarat, rreth 3 km larg Gjirokastrës, e vizituan ministri i Brendshëm Lulzim Basha dhe deputeti i zonës, njëherazi ministri i Bujqësisë, Genci Ruli./n.m/
