Tiranë, 2 Qershor, NOA – Kërkohej prej kohësh nga drejtësia italiane dhe është kapur në një banesë në Vorë, pak kilometra larg Tiranës, i shumëkërkuari Artur Doko.
38 vjeçari Doko, akuzohej nga drejtësia italiane për shfrytëzim prostitucioni në rrethana rënduese, dhe për këtë vepër ishte dënuar nga drejtësia italiane me 7 vjet burg, dënim i njohur edhe nga gjykatat shqiptare.
I shumëkërkuari, përgjatë periudhës së viteve 1998 deri në vitin 2001, ka shfrytëzuar për qëllime prostitucioni në Milano të Italisë, rreth 10 shtetase të shtetësive e kombësive të ndryshme, kryesisht kosovare, rumune, moldave e shqiptare.
Artur Doko, sipas njoftimit të Policisë së Tiranës, u siguronte të dëmtuarave, apartamente dhe dokumente të fallsifikuara qëndrimi në Milano, duke i shfrytëzuar më pas për qëllime përfitimi.
Në një aksion të organizuar në bazë të informacioneve operative, oficerët e hetimit të krimit pranë Policisë së Tiranës, arrestuan të shumëkërkuarin Artur Doko në një banesë në fshatin Vorë.
mit/NOA
