Athinë, 2 Qershor, NOA – Vetëm pak ditë më parë në Athinë mbërriti ministri i Jashtëm serb, Vuk Jeremiç, ndërsa sot në kryeqytetin grek ndodhet vetë presidenti serb, Boris Tadiç.
Që të dy kanë bërë me dije në takimet respektive me autoritetet e larta greke se ekziston një nivel i shkëlqyer i marrëdhënieve midis dy vendeve.
Sikundër ndajnë të njëjtat qëndrime edhe për çështjet aktuale që shqetësojnë rajonin e Ballkanit dhe të ardhmen e tij.
“Në radhë të parë dua t'iu falënderoj për mbështetjen tuaj gjithë këto vite dhe kuptimin esencial të problemeve tona”, theksoi Tadiç ndaj Papuliasit, duke nënkuptuar në këtë mënyrë edhe problematikën e krijuar pas pavarësisë së Kosovës.
Tadiç tha lidhur me këtë se Beogradi “nuk do të njohë në asnjë mënyrë pavarësinë e Kosovës” por do të vazhdojë të ketë një “politikë miqësore” dhe se “është i gatshëm që pas vendimit të Gjykatës Ndërkombëtare të negociojë sërish të ardhmen e kësaj krahine”.
Nga ana e tij, kreu i shtetit grek ka rikonfirmuar qëndrimin grek për “një zgjidhje të pranueshme nga të dyja palët të bazuar në të drejtën ndërkombëtare si dhe ruajtjen e integritetit territorial”.
n.e/NOA
