Rumani - Përleshje Mes Demonstruesve Dhe Policisë
BUKURESHT, 4 qershor /ATSH-MIA/ - Përleshje mes demonstruesve dhe policisë shpërthyen sot në qytetin rumun Brashov, në pjesën qendrore të vendit, kur një pjesë e qytetarëve të pakënaqur nga masat qeveritare për uljen e të ardhurave u munduan të hyjnë me forcë në ndërtesën e administratës lokale.
Në demonstratat në Brashov morën pjesë mijëra persona. Disa prej tyre ndezën qirinj dhe dogjën fotografi të presidentit Traian Basescu.
Federata Kombëtare e Sindikatave të Administratës në Rumani vendosi dje t'i ndërpresë grevat për shkak të presionit nga policia dhe funksionarët rajonalë ndaj të punësuarve në administratë me kërcënime për pushime nga puna, megjithatë në disa qytete rumune protestat vazhdojnë edhe sot./ a.jor.
