Warning: file_get_contents(https://www.njoftime.net/service/xml-last-ads/): failed to open stream: Connection refused in /var/www/vhosts/lajme.gen.al/httpdocs/v2/site/controllers/genel.php on line 1153
Ilir Meta: Vizat brenda vitit, shumë shpejt premtim i realizueshëm
English

Ilir Meta: Vizat brenda vitit, shumë shpejt premtim i realizueshëm

Tiranë, 5 qershor, NOA - Akuzat e Partisë Socialiste për vonesën e liberalizimit të vizave janë një aksion politik i dështuar, ka pohuar zv/kryeministri Ilir Meta, në një intervistë të dhënë për TVSH.

Sipas tij, premtimi i LSI-së për lëvizjen e lirë shumë shpejt do të jetë një premtim i realizueshëm dhe se pjesëmarrja e Kosovës në Sarajevë, ishte një sukses i madh.

Samiti i Sarajevës u cilësua i suksesshëm, por nuk munguan dhe kritikat në median ndërkombëtare, në përfundim të tij, për faktin se në të nuk u caktuan data?

Nuk besoj se ka qenë kompetenca e këtij Takimi të Nivelit të Lartë të Sarajevës për të dhënë data të caktuara. Tashmë është bërë e qartë se perspektiva e Ballkanit Perëndimor është në Bashkimin Evropian dhe zgjerimi i ardhshëm do të vazhdojë më Ballkanin Perëndimor dhe normalisht pritet që vendi i parë i cili do të avancohet është Kroacia, i cili është me një stad më të lartë se vendet e tjera në përmbushjen e kritereve. Megjithatë, është herët për dhënë data, sidomos për vende të tjera sepse atë gjitha janë në faza të ndryshme të procesit.

Kam dëgjuar, për shembull se përse nuk u dhanë data për çështjen e vizave. Por natyrisht ky është një zhgënjim i atyre që nuk e kanë të qartë se nuk është çështja në rastin e vizave e një elementi të tillë politik siç ishte samiti për të dhënë afate për vizat. Në këtë rast funksionojnë tre institucione: Komisioni që ka dhënë propozimin dhe që mbështet fuqishëm këtë proces, më pas është Parlamenti Evropian, është dhe Këshilli i vendeve anëtare. Pra është tjetër aspekti procedurial dhe ligjor dhe është tjetër aspekti politik. Në këtë drejtim Samiti ishte shumë i rëndësishëm, për mendimin tim, pasi në mënyrë të posaçme i kushton vëmendje Ballkanit Perëndimor në një periudhë krize. Është një krizë e përgjithshme, globale, ekonomike, financiare.

Natyrisht po të shohim zhvillimet e fundit në Lindjen e Mesme, apo çështje të mprehta ndërkombëtare, Kora e Veriut, çështjet që kanë të bëjnë me Iranin, për të mos përmendur çështje të tjera të nxehta. Pra është një periudhë ku vërtetë bëhet një sforco për të risjellë në vëmendje rëndësinë që ka forcimi i mëtejshëm i stabilitetit në Ballkanin Perëndimor, për përshpejtimin e procesit të integrimit në Bashkimin Evropian, për një përshpejtim të bashkëpunimit rajonal, si një elemente kyç që përshpejton integrimin dhe zgjidhje të çështjeve të ndryshme bilaterale të mbetura, që është një kusht për çdo vend përpara se të bëhet anëtar i Bashkimit Evropian.

Në këtë drejtim unë mendoj se një ishte një samit i suksesshëm sepse dhe mund të mos realizohej në kushtet e ngjarjeve të ditëve e fundit. Ai tërhoqi vëmendje për shumë çështje dhe të mos harrojmë diçka tjetër, ndryshe nga Samiti i Bërnos, këtu ishin të gjithë, ishte Kosova, ishte dhe Serbia. Dhe ky nuk është një sukses i pakët, kemi për të herë të parë një gjithë-përfshirje, kur bëhet fjalë për Ballkanin Perëndimor.

U gjet një formulë kompromisi që të ulemi të gjithë. Kemi një sjellje konstruktive të të gjithëve në këtë rajon dhe natyrisht për Shqipërinë dhe Bosnjën janë të vetmet vende që përmenden në deklaratën finale, duke u dhënë një mbështetje unanime të dyja vendeve, për shkak të propozimit të Komisionit Evropian për heqjen e vizave sa më shpejt. Pra nënkuptohet që aty janë të gjitha vendet anëtare të Bashkimit Evropian.

Përsa i përket vizave. Nuk do të ketë kushte nga BE? Pra situata politike nuk do të ndikojë?

Nuk e besoj, për arsye se i gjithë ky proces është i ndërtuar mbi një udhërrëfyes konkret, i cili përmban kushte teknike, të ndara në katër blloqe . Ky proces ka nisur para dy vitesh dhe është bërë publik nga zëvendëspresidenti i Komisionit Evropian, Franko Fratni. Dhe është një proces që u vjen në ndihmë vendeve që donin këtë lëvizje të lirë të qytetarëve me Bashkimin Evropian, që të dinin ku do të përqendronin energjitë e tyre dhe të dini se çfarë do të duhej të plotësonin konkretisht.

Gjithë ky proces është i bazuar mbi parimin e të qenit strikt mbi realizimin e kritereve teknike. Shqipëria i ka plotësuar të gjitha në një kohë rekord. Janë tre çështje që janë në vazhdim dhe që pas asnjë diskutim do të përfundojnë në javët e ardhshme. Ky është angazhimi i qeverisë, por është dhe propozim i Komisionit. Vet fakti që Komisioni bënë një propozim pozitiv tregon se janë të gjithë kushtet e mundshme, dhe në të vërtetë besoj se do të ecet sipas procedurave të vendeve të tjera. Procesi është teknik pavarësisht zhvillimet politike në Shqipëri, në Bosnjë apo në vende të tjera. Por kjo nuk do të thotë se situata politike duhet të jetë kjo që është

Kemi pasur akuza nga PS se kjo qeveri e ka vonuar këtë proces?

Këto janë akuza krejtësisht politike dhe të pasinqerta. E përmenda dhe pak më parë që procesi i liberalizimit të vizave dhe udhërrëfyesi konkret, pra manuali i të gjitha kushteve teknike dhe ligjore që duhen plotësuar është shpallur vetëm dy vite më parë. Një vit më parë Komisioni ka bërë propozim për të tre vendet e tjera dhe ne kemi qenë në periudhë fushate, të gjithë e kanë pasur të qartë se Shqipëria nuk mund të merrte vizat me vendet e tjera. Pse? Jo vetëm për shkak të një prapambetje historike administrative, por sepse në atë kohë Shqipëria nuk kishte asnjë pasaportë biometrike të prodhuar.

Sepse në atë kohë para zgjedhjeve gjithë vëmendje u përqendrua te dokumentet e identitetit, si një kusht i domosdoshëm për të legjitimuar zgjedhjet. Kjo ishte dhe kërkesë e gjithë opozitës të asaj kohe. Natyrisht nuk kishte sesi të bëhej një rekomandim i tillë kur dihej se mes shumë e shumë kushteve që duheshin plotësuar, një kusht themelor që qytetarët shqiptare të udhëtojnë në zonën Shengen është që patjetër duhet të kenë një pasaportë biometrike.

Kështu që kjo mendoj se kjo është një akuzë që nuk qëndron. Mua më vjen keq se ky është një proces që u përket të gjithë shqiptarëve, nuk kanë rëndësi se për kë kanë votuar, apo nuk kanë shkuar fare në votime. Pra është një proces madhor, pra është një interes i madh. Nuk ka asnjë popull tjetër në rajonin tonë atë interes dhe atë etje që kanë shqiptarët për këtë çështje, e cila nuk ka të bëjë vetëm me lëvizjen e lirë, por është një çështje dinjiteti. Kemi qenë vendi më i izoluar. Kemi qenë një vend ku ishte një ngjarje e jashtëzakonshme kur një njeri shkonte jashtë shtetit. Ndërkohë që gjithë vendet e tjera, të cilat janë ende në këtë proces, apo vendet që e fituan, janë vende që 20 vite më parë lëviznin në mënyrë të lirë në të gjithë Evropën.

Ndaj opozita duhet të kishte dhënë kontributin e saj gjatë kësaj kohe. Janë miratuar disa ligje, janë miratuar gjithë ato strategji, gjithë ato plane pune. Janë bërë investime të jashtëzakonshme të papara, jo vetëm përsa i takon pasaportave biometrike, por investime të jashtëzakonshme përsa i takon luftës kundër krimit të organizuar. Të jashtëzakonshme përsa i takon kontrollin e kufirit, menaxhimin e integruar të tij dhe natyrisht që në të gjithë këtë proces opozita vetëm se ka akuzuar qeverinë për gjëra që nuk kanë një sens të vërtetë të realizmit dhe nuk kanë marrë përgjegjësinë për të kontribuar në mënyrë pozitive, megjithatë, jemi ende në proces, pavarësisht se ai është pothuajse i mbyllur. Ne o shpresojmë që opozita të jetë pjesë e këtij procesi të paktën tani në etapën e fundit.

Unë kam pasur besim që në fillim se do të realizoheshin qëllimet e vëna dhe jam i bindur se brenda këtij viti, të gjithë qytetarët shqiptarë, natyrisht ata që do të kenë pasaportat e reja biometrike, të gjitha ata do të kenë mundësinë që brenda fundit të këtij viti të lëvizin në hapësirën Shengen.

A besoni se brenda këtij vitit do kemi edhe një përgjigje pozitive lidhur me marrjen e statusit kandidat?

Besoj se përcaktuese do të jenë ato që kanë bëjnë me plotësimin e detyrimeve që kërkon një status i tillë nga ana e Komisionit Evropian. Dua të them se deri tani procesi i integrimit ka ecur plotësisht sipas kalendarit që ka pasur qeveria që me krijimin e saj. Edhe procesi i liberalizimit të vizave, por dhe procesi që ka të bëjë me aplikimin e vendit me marrjen e statusit të vendit kandidat. Në dhjetor erdhi pyetësori, pas vendimit të marrë nga Ministrat e Jashtëm të BE për të ecur përpara me aplikimin e Shqipërisë, të bërë në prillin e vitit të kaluar dhe më duhet të theksojë se ky vendim u mor pas kërkesës që kishte bërë Shqipëria për tu bërë vend anëtar i BE dhe pas qëndrimit që u morë se kjo kërkesë do të shqyrtohej menjëherë pas raportit final të OSBE/ODIHR.

Ky ishte një lloj kushti për të ecur përpara me aplikimin dhe pikërisht pas këtij raporti që u publikua në shtator, në nëntor u morr ky vendim. U paraqit pyetësori nga ana e Komisionit Evropian dhe është bërë një punë e jashtëzakonshme për muaj të tërë, deri në prill të këtij viti, ku u paraqit përgjigja e të gjithë pyetjeve të Pyetësorit nga ana e Kryeministrit Berisha të Komisioneri i Zgjerimit z. Fule.

Njëkohësisht, gjatë kësaj kohe, komisioni ka sjellë disa pyetje shtesë, të cilat janë normale dhe kanë ndodhur në procesin e çdo vendi. Ky është një komunikim i vazhdueshëm dhe do thosha se janë më pak sesa normalisht me vendet e tjera. Edhe për këto angazhimi ka qenë maksimal. I gjithë ky bashkëpunim po ecën në mënyrë shumë të mirë me Komisionin Evropian. Nuk ka asnjë arsye që të mos kemi një vendim pozitiv nga ana e KE. Natyrisht që në këtë rast një kërkesë, sepse ky proces nuk është vetëm i natyrës teknike si vizat, është dhe ajo që ka të bëjë me situatën politike, si një nga kriteret kryesore.

Në këtë pikë unë dëshirojë që tu bëjë apel të gjithëve, veçanërisht opozitës, që të kontribuojë pozitivisht sepse integrimi në BE është një qëllim kombëtar për gjithë qytetarët shqiptarë. Në këtë plan, cilido që për arsye të ngushta nuk do që të investojë pozitivisht nuk duhet të shpresojë se mund të fitojë kredo politike, duke dëmtuar një proces i cili me ritme akoma më shpejta.

Shtatorin e shkuar kur vendosët të bëheshit pjesë e mazhorancës me PD vutë si prioritet integrimin. Sa i kënaqur jini deri tani?

Në përgjithësi jam i kënaqur, sepse deri tani programi i qeverisjes për integrimin në tërësi ka ecur me ritme shumë pozitive dhe janë respektuar të gjitha etapat e parashikuara nga ana e qeverisë. Jemi në fazë përmbyllëse të procesit të liberalizimit të vizave. Jemi deri diku në një fazë përmbyllëse, të paktën në planin teknik për Pyetësorin dhe të përgatitjes për të marrë një mendim pozitiv. Në drejtim të NATO-s, Shqipëria është një vend anëtarë, por gjatë kësaj periudhe Shqipëria ka treguar se ka përmbushur me sukses të gjitha detyrimet që burojnë nga anëtarësimi.

Sekretari i përgjithshëm i NATO-s, Rasmussen, në vizitën e tij, një vit pas hyrjes në NATO, në Tiranë vlerësoi përmbushjen e të gjitha detyrimeve nga ana e Shqipërisë si një vend anëtar i ri i NATO-s. Dhe në drejtim të bashkëpunimit rajonal ka pasur zhvillime gjithë e më pozitive dhe gjithmonë roli dhe angazhimi i Shqipërisë është vlerësuar nga partnerët rajonal, BE-ja dhe vendet e tjera. Unë mendoj se gjithë vizioni i kësaj qeverie, lidhur me integrimin, angazhimin kanë dhënë pasojat e pritura deri më tani.

Lufta kundër korrupsionit dhe krimit të organizuar vazhdon të mbetet një sfidë e kësaj qeverie. Javët e fundit kemi pasur një fluks arrestimesh. Si i shikoni këto?

Lufta kundër korrupsionit dhe krimit të organizuar është një prioritet kyç që ka të bëjë me vet forcimin e shtetit të së drejtës, që do të thotë më shumë siguri dhe një betejë e vazhdueshme për të krijuar një ambient sa më të sigurt për klimën e biznesit vendas dhe të huaj është një sfidë që ka të bëjë në një rezultat final me përmirësimin e mëtejshëm të jetës së vet shqiptarëve.

Mendoj se vullneti ka qenë shumë i qartë, ka pasur zhvillime tepër pozitive. Të mos harrojmë ligjin Anti-Mafia. Është një ligj shumë i rëndësishëm i vlerësuare dhe nga partnerët tanë ndërkombëtarë. Ka qenë dhe një angazhim në kuadër të liberalizimit të vizave sepse synon, jo thjeshtë të ndëshkojë elementët kriminal, por të shkatërrojë bazën ekonomike të aktiviteteve kriminale, që do të thotë ta godasim krimin, jo thjeshtë në protagonistët e tij. Po kështu, strategjia për luftën kundër krimit të organizuar dhe plani veprimit për luftën kundër korrupsionit është shoqëruar me rezultate dhe goditje konkrete. Kjo tregon ndërgjegjësimin se ky është një prioritet shumë i rëndësishëm. Një prioritet i theksuar në mënyrë të qartë edhe në deklaratën finale të Samitit të Sarajevës, pasi një nga shqetësimet e vendeve anëtare dhe sidomos për qytetarët të këtyre vendeve të BE lidhur me zgjerimin dhe anëtarësimin e vendeve të tjera, ka të bëjë me çështje që vijnë nga krimi i organizuar.

Në lidhje me këtë, sinqerisht kur kam parë në lajme vrasjen në një nga gjykatat e Brukselit, fillimisht u lançua lajmi sikur vrasja ishte bërë nga një shqiptar, gjë që nuk ishte e vërtetë sepse u përgënjeshtrua, por fillimisht u anonçua lajmi si i tillë dhe kuptohet se çfarë pasojash sjellë një akt kriminal i një njeriu të papërgjegjshëm për imazhin e një vendi.

Mund të bësh një punë të jashtëzakonshme, por dihet që dhe fuqia e mediave është e jashtëzakonshme. Është e jashtëzakonshme në Shqipëri dhe aq më tepër në vende të konsoliduara dhe një lajm i keq shpërndahet me shpejtësi të jashtëzakonshme dhe sado lajme të mira të bësh e ke të vështirë ta balancosh atë.

Kështu që vendosmëria e qeverisë në luftën kundër fenomeneve negative është e jashtëzakonshme, bashkëpunimi me partnerët ndërkombëtar është në nivele të ngushta, jo vetëm me BE dhe ShBA, por po punohet shumë dhe më vendet e rajonit. Sepse nuk kemi të bëjmë thjeshtë me çështje korrupsioni në Shqipëri, Kosovë apo me Malin e Zi, ky është një fenomen rajonal. Kjo arrihet duke forcuar institucionet e shtetit dhe padyshim që nëse bëhet kjo do të arrihen ato parametra sigurie, transparence dhe kredibilieti. Unë jam i bindur se në këtë drejtim po ecet me vullnet të plotë.

Z. Meta, a keni ju nuanca apo diferenca brenda mazhorancës mbi mënyrën sesi duhet zgjidhur ngërçi politik konkretit për fletët e votimit dhe nenin 178?

Ne kemi qenë në sinkron të vazhdueshëm, në përgjithësi, me lidershipit të Partisë Demokratike lidhur me këtë çështje. Unë kam vënë re, personalisht se Kryeministri Berisha ka pasur vullnet pozitiv për të trajtuar me konstruktivitet pretendimet e PS për transparencën e zgjedhjeve të 28 qershorit duke pranuar idenë e një komisioni hetimor parlamentar. Jo vetëm kaq, por vazhdimisht ka hedhur hapa të reja, si përshembull duke pranuar shumicën në komision, edhe pse shumica i takon mazhorancës. Ka pranuar që kryetari i këtij komisioni ti lihej opozitës edhe pse normalisht do i takonte mazhorancës. Nga ana tjetër për fat të keq nuk kemi pasur kërkesë për dialog, por praktikisht kemi pasur një lloj ultimatumi, që edhe pse shpesh ambalazhohet me fjalën dialog është një ultimatum, “ose këtë gjë, ose nuk ka”.

Meqë përmendet nenin 178 pika 6 që ka të bëjë me administrimin e fletëve të votimit pasi ka përfunduar procesi. Unë se kam ditur, por tani e kam mësuar përmendësh. Fakti që kryetari i PS thotë që nuk jam dakord që të zbatohet ai nen, tregon që përmbajtja e tij është në kundërshtim me kërkesën që z. Rama mund ta quante si kompromis. Mendoj se është e gabuar dhe e papranueshme, për arsye se Kodi Zgjedhor është shkruar nga dy duar, nga dora e Edi Ramës dhe Sali Berishës.

Ju se kini votuar?

Sigurisht. Është një kod që është votuar nga të dy palët kryesore. Ai flet qartë në mënyrë eksplicite, që hapen të gjitha kutitë e votimit, që do të thotë ato ku votojnë qytetarët dhe ato që kanë të bëjnë me materialet zgjedhore dhe kundra-fletët e votimit dhe çdo kundra-flet është e lidhur me fletën përkatëse që ka hedhur qytetari në kutitë e votimit. Dhe pasi i njëjti nen që është një nen integral bënë të qartë se hapja bëhet sipas një procedure që e cakton komisioni dhe aty mund të kish një kompromis.

Por neni thotë hapje të përgjithshme nuk lë asnjë keqkuptim dhe pasi procesverbalet shkojnë në Arkivin e Shtetit të gjitha fletët dhe kundra-fletët digjen në mbikëqyrjen e Komisionit Qendror të Zgjedhjeve. Është e qartë se sesi funksion kjo gjë sepse është e pamundur të bëhet një ndarje nga ana praktike, sepse nëse KQZ-ja është e detyruar ti hapi të gjitha jo nuk do të hapi vetëm ato që kanë materialet, por do të hapi dhe ato që kanë fletët. Së dyti do të kishte dhe një problem praktik, sepse nëse do të shkonin disa nga materialet që janë në kutitë që do hapen detyrimisht për tu çuar në arkivin e shtetit, një pjesë e të cilave mund të zgjidhej me short për tu hetuar nga Komisioni Hetimor dhe askush nuk ka asnjë kundërshtim se kjo është diçka e ligjshme se janë dokumente që merren nga arkivi i shtetit, por të mos harrojmë se kundër-fletët do të mbeteshin në kutitë e hapura dhe kundër-fletët dhe fletët janë të lidhura në mënyrë automatike.

Ata që thonë se nuk e pranojnë këtë nen bëjnë gabim të madh, sepse shteti funksionon në bazë të zbatimit të ligjit, aq më tepër kur këtë nen e kë bërë vet. Ndërkohë kjo nuk është një gjë e domosdoshme për hapjen e fletëve të votimit sepse është bërë e qartë se për këtë çështje, madje është propozuar prej kohësh që në muajin shkurt nga delegacioni i Asamblesë së KE në takimin në Presidencë me z. Berisha dhe z. Rama se mënyra më e mirë për tu dhënë zgjidhje shqetësimeve të z. Rama, i cili njëkohësisht pretendon se hapja e fletëve të votimit dhe rinumërimi i tyre është një e drejtë që ja garanton Kushtetua, ka një mundësi për ta kaluar këtë kërkesë në Gjykatën Kushtetuese dhe më pas në Komisionin e Venecias, gjë që është pranuar nga z. Berisha si një kompromis dhe një garanci më shumë për opozitën.

Të jini të sigurt se nëse kjo kërkesë do ishte bërë deri në shkurt sot do të kishte ardhur një përgjigje nga Komisioni i Venecias dhe kjo çështje do ishte zgjidhur. Pra do kishte në përgjigje për pretendimin e opozitës

Tani palët janë në një dialog pas darkës në Strasburg. Kini ndonjë ndjeni se çfarë është arritur?

Nuk mund të them asgjë të veçantë. Por në rast se do të evidentoja një aspekt të pyetjes tuaj se cila është e veçanta e LSI-së mund të them se në gjithë këtë proces ne jemi përpjekur për të nxitur një vullnet pozitiv konstruktiv në mënyrë që edhe transparenca të bëhet maksimalisht, por edhe vendi të mos cenohet sepse kemi të bëjmë me një aspekt shumë të rëndësishëm që ka të bëjë me faktin që ky vend do të drejtohet mbi bazë të Kushtetutës dhe të ligjit, të cilat janë të barabarta për të gjithë, apo duhet të drejtohet mbi bazë të precedentit. Nëse do të pranohej një precedent për arsye të një kompromisi të caktuar politik, i bie që nesër një pakicë tjetër të bëjë të njëjtën gjë, të ecë në politikën e bllokimit të institucioneve në mënyrë që të imponojë zgjidhje në kundërshtim me ligjin, në kundërshtim me Kushtetutën dhe kështu me radhë. Dhe do ta kalojmë nga një zhvillim normal evropian në një zhvillim që do të na çonte në drejtime të panjohura dhe të gabuara. Dëgjojmë që meqë Kushtetua është shkelur disa herë pse të mos shkelet sërish. Nuk është argument, përkundrazi, ky është kundër argument.

Ka zëra që ju fajësojnë juve për këtë krizë?

Logjika që pse bëri LSI-ja koalicion me PD dhe kjo nuk është gjë e mirë sepse nuk na intereson ne, se do ishte mirë që të bënte koalicion PS me PD ?!! Mendoj se këto janë logjika interesi, nuk janë logjika politike.

A vazhdoni të bashkëpunoni me z. Nano?

Nuk është çështje bashkëpunimi, është çështje më shumë do të thosha, çështje e një respekti për një të kaluar të përbashkët, e cila ka pasur aspektet e saj pozitive, ka pasur dhe problemet e veta, por natyrisht njerëzit shikojnë përpara dhe përpiqen të përforcojnë sa më shumë elementët pozitiv dhe të bashkëpunimit.

Ka një grup të pakënaqurish në radhët e Partisë Socialiste, flas edhe për deputetë. A është e gatshme LSI-ja ti pranoj si pjesë të saj këta?

Qëllimi ynë nuk ka të bëjë me përpjekjen për t’i marrë PS anëtarë, deputetë apo përfaqësues të ndryshëm , sepse nuk besojmë se suksesi i LSI-së do të varet nga lëvizje të tilla. Përkundrazi, unë besoj se suksesi i LSI-së do të varet nga angazhimi i saj në drejtim të një qeverisje e cila prodhon rezultate në interes të vendit dhe të qytetarëve shqiptarë.

Ka një debat kohët e fundit për mënyrën sesi duhen votuar kandidaturat e Presidentit. Cili është qëndrimi i LSI-së ?

Nuk kemi ndonjë përnderim të përcaktuar ende. Ky është një debat që është hapur para pak ditësh dhe unë kam qenë në Sarajevë. Mendoj se rëndësishme është që të ketë një harmoni sa më të mirë midis dy institucioneve që janë përcaktues sipas Kushtetutës për Gjykatën Kushtetuese. Ajo që është e rëndësishme mendoj se ka të bëjë me njohjen e kandidatit nga Parlamenti para se të bëhet votimi.

PD në rastin e kandidaturës që nuk u votua shprehur rezervat e saj për arsye politike. Natyrisht në rast se ka bërë një veprim të mriz ajo merre vlerësime, në rast se jo opinioni publik e ndëshkon e gjykon ndryshe. LSI ka qenë kundër ligjit të lustracionit, i cili një ligj që nuk funksionin për shkak të vendimit të Gjykatës Kushtetuese dhe rekomandimit të Komisionit të Venecias.

Sigurisht PD-ja ka pasur një qëndrim tjetër duke qenë një forcë e djathtë me ngarkesa më të theksuara ndaj komunizmit dhe individëve të caktuara në atë periudhë. Qëndrimi ynë është shumë fleksibël sepse e tillë është koha. Unë mendoj se këto ligje duhet të ishin bërë që në vitet 1990.

Si e gjykoni debatin për shtëpinë e deputetit të PS-së Dashamir Peza. Ju si e gjykoni këtë debat?

Mendoj se ndaj kësaj ngjarje në tërësi ka një reflektim të thellë të lidershipit të PD-së. Kjo është një gjë pozitive përsa i takon edhe Konferencës së Pezës sepse përgjithësisht niveli i përfaqësimit të PD në festimet e Konferencës së Pezës ka qenë në nivelin e përfaqësimit të Prefektit të Tiranës. Kjo është një gjë pozitive. Konferenca e Pezës është një nga ngjarjet më të mëdha të popullit shqiptarë. Për mendimin tim është ngjarja më e madhe gjatë periudhës së okupimit antifashistë, është një sa patriotike edhe demokratike.

Është ngjarje e madhe dhe duhet të përkujtohet diku. Gjatë ngjarjes që më pyesni nuk kam qenë këtu.

Luan Rama ka bërë një prononcim në emër të LSI-së. Unë kam qenë në Sarajevë, më pas kam folur me Ministrin e Brendshëm, sepse shqetësimi kryesor ka qenë prezenca e policisë rreth shtëpisë dhe që ka diçka e tepruar duke qenë se aty jeton një deputet dhe kjo nuk është çështje që mund të zgjidhjet në një mënyrë të tillë duke qenë arrogant. Kemi të bëjmë me një teprim, natyrisht kjo nuk ka arsye politike. Të paktën mesa kam folur me ministrinë e Brendshëm ka qenë një vendim i qeverisë dhe përfaqësuesi i Ministrisë së Kulturës ka vlerësuar se duhej të procedohej në këtë mënyrë. Për fat të mirë nuk ka pasur tension të mëtejshëm, sepse unë mendoj se kjo çështje zgjidhet me dialog. Sepse unë mendoj se z. Peza është i interesuar për të kontribuar në përkujtimin e kësaj ngjarje të madhe duke qenë se i takon asaj familje që mikpritjen e gjithë patriotëve.

Zoti Servet Pëllumbi ka thënë se Rama nuk mund të jetë më kryetar Bashkie dhe partie. A mund të jeni ju kandidat për Bashkinë e Tiranës?

Këtë gjë për herë të parë po e dëgjoj nga ju. Ndërsa për vlerësimin që është thënë nga z. Pëllumbi për z. Rama kjo është një çështje e brendshme e PS. Është një zgjedhje e z. Rama nëse do të kandidojë apo jo. Ky nuk është një element i rëndësishëm, as për mua dhe as për mazhorancës.

TVSH

KOMENTE