Durres: Digjet Autobuzi Urban Pas Avarise, Asnje Udhetar I Demtuar
AR
DURRES, 7 qershor /ATSH-Gëzim Kabashi/. - Autobuzi i linjës urbane Plepa- Durrës është përfshirë sot pasdite nga flakët, ndërsa fatmirësisht udhëtarët nuk kanë pësuar asnjë lëndim.
Burime zyrtare nga drejtoria e policisë së qarkut bënë të ditur për ATSH-në se autobuzi urban, që udhëtonte në drejtim të qytetit bregdetar, ka patur një avari në vendin e quajtur Bar Refugjati, vetëm 300 metra larg stacionit hekurudhor të Durrësit.
Burimet thanë se mbi 35 udhëtarë kanë zbritur nga automjeti i udhëtimit publik vetëm pak sekonda para se ai të merrte flakë.
Forcat zjarrfikëse, që kanë mbërritur menëjherë në vendngjarje, kanë mundur të shmangin përhapjen e flakëve. Ekspertët thanë se shkak i djeges së autobuzit mund të ketë qenë një qark i shkurtër elektrik në sistemin e pjesës së pasme, ku ndodhet edhe motorri i automjetit.
Hetimet vazhdojnë, përfunduan burimet. /a.ke/
