Korçë, 13 qershor, NOA – Akuzohej për trafik droge nga drejtësia italiane, jetonte në Maqedoni dhe është arrestuar dje nga Policia e Korçës.
Bëhet fjalë për 44 vjeçarin Mevludi Rifati nga komuna Strugë e Maqedonisë. Sipas policisë arrestimi është bërë pasi për Rifatin ekzistonte një urdhër arresti ndërkombëtar nga Gjykata e Bolzanos në Itali.
Akuza që rëndonte mbi të ka qenë shkelje e nenit 110 të Kodit Penal Italian dhe neneve 73 dhe 80 te aktit 309/90 për drogën.
Ai akuzohej për veprën bashkëpunim në trafik droge dhe është dënuar nga gjykatat italiane.
Sipas njoftimit të policisë Rifati duhet të kryejë dhe 8 vjet 11 muaj dhe 21 ditë burg.
m.xh/NOA
