Gramsh: Vidhet Kisha E Grabovës
GRAMSH, 14 qershor/ATSH-Miranda Sadiku/ - Mesnatën e djeshme është vjedhur me thyerje kisha "Shënkoll" në Grabovë të rrethit të Gramshit , rreth 40 kilometra larg këtij qyteti.
Burime nga Policia bëjnë të ditur për ATSH se "shtetas ende të paidentifikuar kanë shkatërruar me leva derën e kishës si dhe murin ballor ku mbahen meshat e javës."
Sipas policisë, autorët kanë vjedhur dy kanape që datojnë rreth vitit 1803, me dru panje të pikturuara me elementë dekorativë kishtarë.
Mësohet se vjedhjen e ka konstatuar prifti i kishës Mihal Prifti, i cili është shprehur se vlera historike e kanapeve është e pallogaritshme.
Kryetari i shoqatës kulturore "Grabova" , Todi Buza, u bëri thirrje organeve koptente për mbrojtjen e historisë së kësaj zone me shumë vlera historike, kulturore dhe etnografike në kulturën Shqiptare. Mësohet se Policia ka shoqëruar disa persona dhe po punon për identifikimin dhe kapjen e autorëve./ch/
