Osbe E Gatshme Të Kontribuojë Në Qetësimin E Situatës Në Kirgistan
- Organizata bëri thirrje për ndalje të dhunës në vend
VJENË, 15 qershor /ATSH-AFP/ - Organizata për Sigurinë dhe Bashkëpunimin në Evropë (OSBE), bëri thirrje sot për ndaljen e dhunës në Kirgistan dhe deklaroi se është e gatshme të ndihmojë në zgjidhjen e krizës në vendin e Azisë Qendrore.
Në këtë deklaratë të publikuar gjatë një takimi të posaçëm të Këshillit të Përhershëm të OSBE-së në Vjenë, 56 vendet anëtare të organizatës transatlantike "shprehën shqetësim të thellë lidhur me zhvillimet e ditëve të fundit dhe u bënë thirrje të gjitha komuniteteve në Kirgistan të largohen nga dhuna dhe të kenë vetëpërmbajtje".
OSBE deklaroi se "është e gatshme të ndihmojë Kirgistanin pas kërkesës së këtij të fundit për zgjidhjen e krizës së krijuar dhe parandalimin e përhapjes së tensioneve në rajon".
Kazakistan aktualisht mban presidencën e radhës së OSBE-së dhe ambasadori i tij, Kairat Abdrakhmanov, deklaroi se vendet anëtare të organizatës janë "bashkuar të ndërgjegjshëm për nevojën urgjente të rivendosjes së paqes në Kirgistan dhe parandalimin e valëve të reja të dhunës dhe humbjeve të jetëve të pafajshme njerëzore".
Abdrakhmanov shfaqi ''besim në kapacitetet e OSBE-së për t'i ofruar mbështetjen popullit të Kirgistan, në bashkëpunim me të gjithë faktorët e tjerë të arenës ndërkombëtare"./
/i.p/
