Durrës: Porti Detar Hap Dyert Për Qytetarët Dhe Veprimtaritë Kulturore
DURRES, 20 qershor /ATSH-Gëzim Kabashi/.- Porti detari i Durrësit ka qenë krejtësisht i hapur gjatë gjithë mbrëmjes së kaluar për vizitat e qytetarëve në zonat e ndryshme portuale, si dhe duke mbështetur veprimtaritë kulturore për të gjitha grupmoshat.
Drejtori i Autoritetit portual, Eduard Ndreu tha për ATSH-në se performaca "Porti yt" kushtuar fëmijëve, hapi serinë e veprimtarive të organizuara në sektorë të ndryshëm të portit, ku qytetarët patën mundësi të shikonin nga afër mjediset e kullës së Kapitenerisë, Sallën operative të sistemit të sigurisë, Terminalin e konteinerëve dhe Kontrollin doganor me anë të skanimit.
"Zjarrfikësit portualë organizuan një performacë të veçantë me automjetet dhe forcat e shpëtimit portual", shtoi Ndreu.
Ekspozita e arteve pamore bashkëkohore me temë nga porti ishte një nga stacionet e shikuesve të shumtë që mbushën mbrëmë për herë të parë mjediset e portit më të madh të vendit, ndërsa koncerti me muzikë Pop dhe Rock ka bashkuar për herë të parë këngëtaren Samanta Karavello dhe bendin muzikor të Vedat Ademit.
Artistët e rinj të kompanisë teatrore "Dance theatre" nën drejtimin e Gjergj Prevazit intepretuan në mjedise të hapura disa nga etydet më të bukura të përgatitura në vite. Nën ritmet e DJ të ardhur nga Durrësi dhe Tirana një pjesë e madhe e të rinjve kanë qëndruar deri në orët e vona të natës në portin e Durrësit./n.m/
